5 Pinoy kabilang sa 39 na nasawi sa tumaob na Chinese fishing vessel sa Indian Ocean

Limang Filipino crew ang kabilang sa nasawi sa tumaob na Chinese fishing vessel sa Indian Ocean noong nakaraang linggo.

Kinumpirma ito ng Philippine Coast Guard (PCG) batay sa report mula kay Transport Minister Li Xiaopeng ng China.

Ayon kay PCG Spokesperson, CG Rear Admiral Armand Balilo, simula nang mangyari ang insidente ay nagpatuloy ang monitoring at koordinasyon ng Coast Guard sa Australian Maritime Rescue Center at sa Chinese Embassy as hinggil sa status ng search and rescue (SAR) operations.

Nagpaabot ang PCG ng pakikiramay sa pamilya ng mga nasawing Pinoy.

Samantala, kinilala din ng PCG ang sakripisyo ng Australian at Chinese SAR teams na nagsagawa ng operasyon sa Indian Ocean.

Pinasalamatan ni CG Vice Admiral Punzalan ang lahat ng tumulong sa operasyon. (DDC)