Sinibak na si Mayo at kaniyang superior pinatawan ng contempt ng senado

Pinatawan ng contempt ng Senate Committee on Public Order and Dangerous Drugs ang sinibak na si Police Master Sergeant Rodolfo Mayo Jr. at kaniyang superior na si Lt. Col. Arnulfo Ibañez.

Kaugnay ito ng ginagawang imbestigasyon ng senado sa pagkakakumpiska sa P6.7 billion na halaga ng shabu sa Maynila.

Naghain ng mosyon si Senator Raffy Tulfo para i-cite for contempt si Ibañez dahil sa pagsisinungaling nito sa pagdinig.

Paulit-ulit ang pagsagot ni Ibañez na wala siyang alam, wala siyang ideya at wala siyang personal knowledge sa insidente.

Gayunman, ayon kay Tulfo, bilang isang sarhento lamang si Mayo ay imposibleng hindi alam ng kaniyang superior ang kaniyang ilegal na aktibidad.

Si Ibañez ang superior ni Mayo nang maaresto ito noong Oct. 2022 at mahulihan ng 990 kilograms ng hinihinalang shabu. (DDC)