3 centenarian sa Taguig tumanggap ng tig-P100,000 birthday cash gift

Masayang naghandog ang Lokal na Pamahalaan ng Taguig sa pamamagitan ng Office of Senior Citizens Affairs (OSCA Taguig) ng centenarian birthday cash gift na P100,000 sa tatlong sentenaryo.

Dahil sa regalong ito na bahagi ng Caring City agenda ni Mayor Lani Cayetano, napuno ng galak sina Antonia Alano, 100-anyos (First Grant),residente sa Brgy. Bagumbayan; Antonia Gavierez, 103-anyos (Fourth Grant) ng Brgy. Hagonoy; at Maria Quintua, 101-anyos (Second Grant) mula sa Brgy. North Daang Hari sa kasagsagan ng pagdiriwang ng kani-kanilang kaarawan ngayong buwan.

Nakatanggap ang bawat sentenaryo ng lungsod ng ₱100,000 cash gift pagtungtong nila ng 100-anyos ay patuloy na makatatanggap ng halagang ito kada taon hanggang sila ay nabubuhay.

Isa lamang ito sa mga programa ng lungsod para sa mga senior citizen ng probinsiyudad. Ayon sa kanilang age bracket, nakatatanggap ang Taguigueño senior citizens mula ₱3,000 hanggang ₱10,000 bilang birthday cash gift.

Bukod pa rito ang libreng gamot para sa mga sakit tulad ng diabetes, high blood at asthma; libreng nursing services sa kanilang tirahan; libreng wheelchairs, canes at hearing aids.

Binibigyan din sila ng mapaglilibangan sa Center for the Elderly, na limang-palapag na gusali sa Brgy. North Signal na may therapy pool, sauna, gym, ballroom area, massage room, at cinema.

Tunay umano na masarap tumanda sa Taguig dahil sa mga programang tumutugon sa mga pangangailangan ng mga nakatatanda. (Bhelle Gamboa)