Heat Index sa Catbalocan City, Samar papalo sa 56 degrees Celsius
Posibleng pumalo sa 56 degrees Celsius ang maximum heat index sa Catbalogan City, sa Samar bukas, araw ng Martes.
Kaya naman patuloy ang panawagan ng health experts sa publiko na mag-ingat sa gitna ng tumataas na temperatura ngayong dry season.
Inaasahan naman na bahagyang bababa sa 51 degrees Celsius ang heat index sa naturang lungsod pagsapit ng miyerkules.
Babala ng Department of Health, ang mataas na temperatura ay maaring magdulot ng heat stress at heat stroke.
Paliwanag ni DoH Undersecretary Eric Tayag, sa heat stress at heat exhaustion, makakaramdam ng sobrang pawis at uhaw at maaring himatayin, subalit sa heat stroke ay wala nang pawis na mailabas at namumula na ang balat.
Upang maiwasan ang heat stress at heat stroke, hinimok ng doh ang publiko na uminom ng tubig, gumamit ng payong kapag lalabas ng bahay, at magpahinga. (Ricky A. Brozas)
