2 arestado sa cara y cruz, P420K ‘shabu’ nakumpiska sa Makati

Naaresto ng otoridad ang dalawa sa isang grupo ng lalaki na naaktuhan umanong nagsusugal ng cara y cruz at nakumpiska ang tinatayang ang 62 na gramo ng ‘shabu’ na may standard drug price value na ₱421,600 sa Makati City.

Ang mga suspek ay nakilalang sina Gemy Batoy y Calingo, 26-anyos; at alyas Nathaniel, 18-anyos.

Sa ulat na natanggap ng Southern Police District (SPD), nagpapatrulya ang mga tauhan ng Makati City Police Poblacion Substation nang lapitan sila ng isang nakabisikleta at isinumbong ang nagaganap na ilegal na sugal ng isang grupo ng lalaki sa Bernardino St., Laperal Compound, Brgy. Guadalupe Viejo, dakong alas-2:30 ng madaling araw nitong Abril 10.

Sa pagresponde ng otoridad nadatnan ang mga suspek na nagsusugal ng cara y cruz sa lugar na nagresulta ng pagkakaaresto nina Batoy at alyas Nathaniel habang nagawang makatakas ang iba.

Nakumpiska ang umano’y ilang pakete na naglalaman ng ilegal na droga, ₱1,040 na pusta sa sugal, at tatlong piraso ng ₱1 coins na ginamit na pangara.

Nakatakdang sampahan sa korte ang mga suspek ng kasong paglabag sa P.D 1602 at RA 9165. (Bhelle Gamboa)