Isa pang nasawing pasahero ng MV Lady Mary Joy 3 natagpuan sa Basilan; bilang ng nasawi sa nasunog na barko 32 na

Natagpuan ng mga tauhan ng Philippine Coast Guard (PCG) ang bangkay isa sa mga pasahero ng nasunog na MV Mary Joy 3 na palutang-lutang sa Langgas Island, Maluso, Basilan.

Natagpuan ang katawan sa umaga ng araw ng Linggo, Apr. 9.

Nakilala itong si Alses Hassan na una nang naitalang nawawalang pasahero ng MV Lady Mary Joy 3.

Dinala ng mga tauhan ng PCG sa MDRRMO Maluso ang labi ni Hassan.

Nagpapatuloy pa ang paghahanap ng Coast Guard sa isa pang nawawalang pasahero ng barko.

Sa datos ng PCG, mayroong 205 na sakay ang barko.

Umakyat na sa 32 ang nasawi na kinabibilangan ng 15 na na-recover sa karagatan at 17 na natagpuan sa nasunog na barko. (DDC)