Las Pinas LGU muling ginawaran ng Seal of Good Financial Housekeeping ng DILG

Muling nakamit ng Las Piñas City Government ang Seal of Good Financial Housekeeping (SGFH) para sa taon 2022 mula sa Department of the Interior and Local Government (DILG).

Binigyang pagkilala ng DILG ang magagandang hakbang sa pamamahala ng lokal na pamahalaan at tamang panggasta nito sa kaban ng bayan upang tuluy-tuloy ang paghahatid ng mas maayos na mga serbisyo at programa para sa mga residente ng Las Piñas.

Malugod namang tinanggap ni City Vice Mayor April Aguilar kasama ang mga konsehal ng lungsod ang Plaque of Recognition ng Las Piñas para sa pagkakasungkit sa 2022 SGFH mula sa DILG.

Nabatid na ang Las Piñas ay ginawaran ng SGFH sa loob ng siyam na magkakasunod na taon kung saan noong 2014 unang ipinagkaloob ng DILG ang pagkilala nito sa lungsod.

Samantala lubos na nagpapasalamat si Mayor Imelda “Mel” Aguilar sa DILG sa ipinagkaloob na pagkilala sa Las Piñas na bahagi aniya sa ipinangako niyang tuloy ang tapat at progresibong serbisyo. (Bhelle Gamboa)