3 arestado ng PDEA sa isang drug den sa Dumaguete City

Naaresto ng mga tauhan ng Philippine Drug Enforcement Agency (PDEA) ang tatlong katao sa sinalakay na drug den sa Zone 4, Barangay Looc, Dumaguete City, Negros Oriental.

Kabilang sa nadakip ang operator at drug den maintainer na si Al S. Pracio, alyas Alo.

Naaresto din ang dalawang drug den visitors na sina Bharry Bhon Rafales at Lemuel Pagbonocan.

Nakumpiska sa isinagawang operasyon ang limang pakete ng hinihinalang shabu na may bigat na 13 grams at tinatayang aabot sa P88,400 ang halaga.

Sasailalim sa chemical analysis ang mga nakumpiskang ebidensya sa operasyon.

Ang mga suspek naman ay mahaharap sa kasong paglabag sa RA 9165 o Dangerous Drugs Act of 2002. (DDC)