Mahigit 400,000 na katao kukuha ng Civil Service Exams sa Mar. 26

Umabot sa 403,567 ang bilang ng mga kukuha ng Civil Service Exams sa gagawing pagsusulit sa March 26, 2023.

Sa datos ng Civil Service Commission (CSC) higit itong mas mataas kumpara sa bilang ng mga kumuha ng Career Service Examination – Pen and Paper Test (CSE-PPT) noong August 2022 na umabot lang sa 147,877 registrants.

Sa 403,567 na kukuha ng pagsusulit, 350,645 o 86.89% na examinees ang kukuha ng CSE-PPT-Professional level, habang 52,922 o 13.11% ang Subprofessional test.

Mayroong 94 na testing centers sa buong bansa para sa March 26 Career Service Exam.

Ayon kay CSC Chairperson Karlo Nograles, dinagdagan ang bilang ng testing centers dahil sa paglobo ng bilang ng mga kukuha ng pagsusulit. (DDC)