Barkong patungo ng Cebu City, sumadsad sa bahagi ng Talibon, Bohol

Nagpadala ng barko ang Philippine Coast Guard (PCG) para asistihan ang MV Starlite Saturn na sumadsad sa karagatan ng Danajon Bank, Calituban, Talibon, Bohol.

Ipinadala ng Coast Guard ang BRP Malamawi para tumugon sa naturang insidente.

Ayon sa PCG, umalis ng Surigao Port ang MV Starlite Saturn at patungo sana sa Pier 5, Cebu City.

Lulan nito ang 87 pasahero, 54 na crew, 2 Coast Guard Sea Marshals at 12 Rolling Cargoes.

Ayon sa PCG, nagawa nilang ma-contact ang PCG sea marshals na sakay ng barko at kinumpirma ni CG Seaman First Class (SN1) Cliftun Bert Etulle na maayos ang kondisyon ng lahat ng pasahero at crew ng barko.

Sinabi din ni Etulle na sumadsad ang MV Starlite Saturn at wala namang namataang oil spillage sa karagatan. (DDC)