TINGNAN: Parokya ni Edgar, ipinakita ang kalagayan ng gitarista nilang si Gab
Bagaman mayroon pa ring cancer ay bahagya nang bumuti ang kalagayan ng gitarista ng Parokya ni Edgar na si Gab Chee Kee.
Sa update na inilabas sa Facebook page ng banda, sa unang pagkakataon mula nang kanilang kumpirmahin sa publiko ang sakit ng gitarista ay ipinakita ng PNE ang larawan nito.
“FACE REVEAL! Woke up feeling cute, might delete later. Hehe Joke lang! Dahil sa tulong, dasal, at good vibes niyo, eto si Gab ngayon!,” ayon sa PNE.
Sinabi ng banda na masaya si Gab na mula sa ICU ay nakalipat na siya sa regular room.
Isa-isa na ring tinatanggal ang mga tubes na nakakabit sa kaniyang katawan.
Inilarawan din ng PNE si Gab na “excited at parang bata” dahil nag-gigitara ito habang papunta sa regular room.
“May cancer pa rin siya, so tuloy-tuloy pa rin ang laban para makasama na namin siya on the stage soon! Laban pa Gab! Kayang-kaya yan!” ayon pa sa grupo.
Patuloy ang fund raising program ng PNE para sa pagpapagamot ni Gab na na-diagnose ng Lymphoma noong nakaraang taon. (DDC)
