Apat na drug personalities sa Parañaque City

Apat na umano’y drug personalities kabilang ang dalawang High Value Individuals (HVI) ang nadakip ng otoridad sa ikinasang buy-bust operation sa Parañaque City.

Kinilala ni Southern Police District (SPD) District Director, Brigadier General Kirby John Kraft ang mga naarestong suspek na sina Lyka Ballecer Gutierez, alyas Lanlan, 30-anyos; Ivan Delacalzada Balero, 32-anyos,kapwa tinaguriang HVI-pusher; Oliver Garcia Miranda, 36-anyos; at Darwin Malbarosa Mananis, 32-anyos.

Sa ulat ng pulisya,dakong alas-3:20 ng hapon nitong Pebero 17 nagsagawa ng buy-bust operation ang mga operatiba ng SPD Drug Enforcement Unit kasama ang DID, DSOU, DMFB, PDEA-SDO at SDEU-Parañaque City Police sa Jordan Street Tramo 2 Block 31 Lot 15 Barangay San Dionisio sa lungsod na nagresulta ng pagkakatimbog sa apat na suspek.

Nasamsam ng operating units ang umano’y 20 gramo ng shabu na tinatayang nagkakahalaga ng ₱136,000, cellphone, sling bag, buy-bust money, caliber .45 colt automatic M1911AI United States property SN166070 at magazine na may tatlong bala ng naturang baril.

Dinala ang mga suspek sa tanggapan ng SPD DDEU habang inihahanda ang pagsasampa laban sa kanila ng kasong Comprehensive Dangerous Drugs Act of 2002. (Bhelle Gamboa)