Higit P6M na ilegal na droga nakumpiska sa Taguig; lider at kasapi ng drug group naaresto

Nakumpiska ng otoridad ang tinatayang P6,814,250 na halaga ng umano’y shabu at marijuana habang naaresto ang sinasabing lider at kasapi ng drug group sa katimugang Metro Manila ayon sa Southern Police District (SPD).

Nagkasa ng anti-illegal drugs buy-bust operation ang mga operatiba ng NCRPO-RDEU kasama ang Taguig at Pasay Station Drug Enforcement Unit sa loob ng parking lot sa The Fort Strip, Fort Bonifacio, Taguig City na nagresulta ng pagkakaaresto ng mga miyembro ng Yang Drug Group na nag-ooperate sa lungsod ng Muntinlupa, Makati, Pasig, Pasay at Taguig.

Nasamsam ng operating units ang 1 kilo ng ‘shabu’ na nakasilid sa plastic tea bag na nagkakahalaga ng P1.2 million at marked money sa mga suspek na sina Kun Yang, 26, Chinese National at Yang Tao, 29, Chinese National, kapwa nakalista bilang High Value Individuals; at Faith Jovenes Suñiga, alyas Nina/Trixie, 18.

Bukod dito, nakakumpiska rin ang otoridad ng 9.5 grams ng marijuana “Kush”; 62 pirasong maliliit na pulang tablets at 38 pirasong pink round tablets na umano’y Chinese Magoo/MAGU, at dalawang sasakyan.

Ang mga nakumpiskang ebidensiya na dinala sa SPD Forensic Unit upang suriin habang nakapiit naman ang mga suspek sa RDEU Custodial Facility. (Bhelle Gamboa)