Free Civil Service Examination review handog sa Las Piñas LGU employees

Aabot sa 200 na empleyado ng Las Piñas City Government ang pinagkalooban ng libreng review ng Civil Service Examination na nakatakdang ganapin ang pagsusulit sa darating na Marso 26.

Sa inisyatibo nina Mayor Mel Aguilar at Vice Mayor April Aguilar ay sinimulan ng lokal na pamahalaan ang free review para sa mga empleyado nitong Pebrero 11 upang mabigyan sila ng pagkakataon na magkaroon ng eligibility.

Layunin ng proyektong ito na mas maging progresibo pa ang katayuan ng mga empleyado ng Pamahalaang lokal.

Tatagal ang libreng review ng anim Sabado na may petsang Pebrero 11,18, 25, Marso 4,11, at 18 bilang paghahanda sa naturang pagsusulit.

Inatasan naman ni Mayor Mel Aguilar ang Human Resource Management Office na mangasiwa sa nasabing proyekto.

Binigyang-diin ng alkalde na dapat pangalagaan ang bawat empleyado upang magkaroon pa ng mas magagandang oportunidad para na rin sa kanilang kinabukasan. (Bhelle Gamboa)