Limang sundalo patay sa shooting incident sa Camp Evangelista sa CDO City

Lima ang nasawi kabilang ang gunman sa naganap na shooting insidente sa loob ng isang kampo sa Cagayan de Oro City.

Ayon kay Maj. Grancisco Garello Jr. tagapagsalita ng 4th Infantry Division ng Philippine Army, “isolated incident” ang nangyari sa loob ng Camp Evangelista kaya walang dapat ipangamba ang publiko.

Tiniyak ng pamunuan ng Philippine Army na gagawa ng mga hakbang para maiwasang mangyari ang kahalintulad na insidente.

Ang pamamaril ay naganap sa bahagi ng Service Support Battalion sa loob ng kampo.

Kabilang sa nasawi ang apat na tauhan ng SSBn.

Nagtulung-tulong naman ang mga sundalo na awatin ang gunman, dahilan para masawi din ito.

Nagsasagawa na ng imbestigasyon ang Army sa nangyari.

Samantala sa inilabas na police report ng Cagayan de Oro City Police Office, kinilala ang mga nasawi na sina CPL BERNARD A. RODRIGO, 31-anyos; PVT JOSEPH A. TAMAYO, 38-anyos; SGT ROGELIO O. ROJO JR.,29-anyos; PFC PRINCE KEVIN C. BALABA.

Nasawi din ang gunman na si PVT JOHMAR A. VILLABITO, 35-anyos.

Sa inisyal na imbestigasyon ng pulisya, bigla na lamang namaril sa loob ng kampo si Villabitio gamit ang kaniyang service firearm na M16 rifle. (DDC)