Pateros Police may bagong hepe

May bago ng hepe ng Pateros Municipal Police sa katauhan ni Colonel Wilson Alicuman, ayon sa Southern Police District (SPD).

Ito ay matapos ang isinagawang simpleng turn-over of office na pinangunahan ni SPD District Director, BGen. Kirby John Kraft kasama sina Col. Andres Simbajon Jr. CDS at Lt. Col. Ronaldo Plecerda, AC, DPRMD sa Pateros Municipal Police Station, E Ragas Street, Barangay Sta Ana sa nasabing lungsod.

Pinalitan ni Col. Alicuman bilang hepe ng Pateros Police si Col. Aldrine Gran matapos makumpleto ang taon na pagkakatalaga nito sa naturang himpilan ng pulisya.

Dumalo sa programa si Mayor Miguel Fernando Ponce III na nagpahayag ng kanyang pasasalamat sa pagtulong ni outgoing COP Col. Gran sa pagpapanatili ng kapayapaan at kaayusan sa nag-iisang bayan sa Metro Manila.

Umaasa naman ang alkalde na ipagpapatuloy ni Col. Alicuman ang nasimulang magandang layunin ng otoridad para sa kapakanan ng mamamayan. (Bhelle Gamboa)