Panghapon na klase sa mga paaralan sa 5 barangay sa Naujan, Oriental Mindoro suspendido

Sinuspinde ang panghapong klase sa mga paaralan sa limang barangay sa bayan ng Naujan, Oriental Mindoro.

Bunsod ito ng naranasang biglaang pagbaha sa ilang mga barangay na sakop ng District 7 sa naturang munisipalidad.

Sa pakikipag-ugnayan ng lokal na pamahalaan sa Department of Education (DepEd) DRRM Coordinator ng SDO Oriental Mindoro, sinuspinde ang pasok sa mga paaralan simula 12:00 ng tanghali araw ng Martes, Jan. 31 sa mga sumusunod na barangay:

– Arangin
– Masagana
– Balite
– Aurora
– Evangelista.

Pinayuhan din ang mga estudyante at mga guro sa ibang barangay na hindi nabanggit at may madadaanang mga lugar na baha na huwag na munang pumasok para sa kanilang kaligtasan. (DDC)