18 tripulante huli sa pagnanakaw ng diesel

Nahuli ng Philippine Coast Guard (PCG) ang isang barko at tatlong bangka na ginagamit sa pagnanakaw ng diesel sa Navotas Fish Port.

Ayon sa PCG, nagpapatrulya ang PCG team nang maaktuhan ang MV Mirola 1 sakay ang 5 tripulante na nagsasalin ng diesel sa 3 bangka na may sakay namang 13 tripulante.

Ang tatlong bangkay ay ang Palawan Pirates 2022, Palawan Pirates 2023 at Palawan Patrick.

Agad nagsagawa ng inspeksyon ang PCG Team sa apat na sasakyang pandagat at doon nakumpirmang sangkot ang mga ito sa fuel pilferage.

Humigit-kumulang 20,000 hanggang 30,000 na litro ng diesel ang naisalin ng MV Mirola 1 sa 3 bangka.

Ayon sa PCG, sangkot din ang 3 bangka sa fuel pilferage sa Bataan at Batangas.

Agad dinala sa Coast Guard Sub Station Navotas ang mga sangkot na sasakyang pandagat at mga tripulante para sa isasampang karampatang kaso. (DDC)