P27M na rebate ipatutupad ng Maynilad ayon sa MWSS

Mahigit P27 million ang ipatutupad na rebate ng Maynilad Water Services Inc. sa mga customer nito na naapektuhan ng putul-putol na serbisyo mula Dec. 2022 hanggang Jan. 2023.

Ang kabuuang halaga ng rebate ayon sa Metropolitan Waterworks & Sewerage System (MWSS) ay P27,477,617 na ibabalik ng Maynilad sa kanilang customers.

Sa Jan. 31, 2023 ay magsasagawa ang MWSS ng information drive para mabigyan ng kaalaman ang publiko sa sakop at iba pang detalye ng rebate program.

Una nang napatunayan ng Regulatory Office ng MWSS na nilabag ng Maynilad sa Service Obligation nito na tiyakin ang availability ng uninterrupted 24-hour supply ng tubig sa mga customer na nasa Putatan Water Treatment Plants Supply Zone.

Sa pulong na idinaos noong Jan. 6, 2023, tinanggap ng Maynilad ang naging findings ng MWSS-RO at boluntaryong nagsabi na magpapatupad sila ng rebate. (DDC)