Babae patay sa pamamaril sa Parañaque City

Dead on the spot ang isang babae matapos barilin ng hindi kilalang suspek sa Parañaque City.

Ang biktima ay kinilalang si Manilyn Acuesta Guinto,35, at residente sa Bagong Ilog Street, Barangay Baclaran, Parañaque City.

Patuloy pang inaalam ng otoridad ang pagkakakilanlan ng gunman.

Sa ulat ng Parañaque City Police, naganap ang pamamaril sa Dimasalang Extension, Brgy. Baclaran.

Nakarinig ng sunud-sunod na putok ng baril ang mga residente sa lugar hanggang sa matagpuang duguang nakabulagta at wala ng buhay ang biktima sa gitna ng kalsada.

Narekober sa pinangyarihan ng insidente ang dalawang basyo ng bala ng .45 caliber at isang deformed slug.

Nagsasagawa ng masusing imbestigasyon ang otoridad upang matukoy ang motibo sa pamamaslang at agad maaresto ang suspek. (Bhelle Gamboa)