2 arestado sa P345K na halaga ng ‘shabu’ sa Makati City

Inihahanda na ng Makati City Police ang pagsasampa ng kasong paglabag sa Comprehensive Dangerous Drugs Act of 2002 laban sa dalawang lalaki na nasamsaman umano ng 50.8 gramo ng hinihinalang shabu na nagkakahalaga ng ₱345,440 sa isang buy-bust operation sa lungsod.

Kinilala ni Southern Police District (SPD) Director, Brigadier General Kirby John Kraft ang mga suspek na sina Luisito Matias III, alyas Talangka, 22, at Axel Caleja, alyas Balong, 24.

Nadakip ang dalawang suspek sa ikinasang buy-bust operation ng mga tauhan ng Station Drug Enforcement Unit, Sub Station 3 at Intelligence Division, sa No. 7268 J. Victor St. Brgy. Pio Del Pilar, Makati City.

Bukod sa nakumpiskang shabu nakuha din ng mga otoridad ang 57 gramo ng umano’y marijuana na may halagang P6,840, at buy-bust money.

Nakakulong sina Matias at Caleja sa SIDMS Section para sa kaukulang imbestigasyon. (Bhelle Gamboa)