P652K na halaga ng shabu nakumpiska; high value target naaresto sa Pasay

Aabot sa 96 gramo ng hinihinalang shabu na nagkakahalaga ng P652,800 ang nakumpiska ng otoridad sa isang high value individual sa ikinasang buy-bust operation sa Pasay City.

Ang naarestong suspek ay kinilalang si Ronald Parisan alyas “Ronald/Nald”, 26-anyos.

Ikinasa ang buy-bust operation ng mga operatiba ng Pasay City Police Station Drug Enforcement Unit at Sub-Station 8 sa panulukan ng Chapel Road at NAIA Road, Barangay 194, Zone 20, Pasay City na nagresulta ng pagkakaaresto ng suspek.

Narekober ng operating team ang sinasabing ilegal na droga, marked money, navy blue Lazada plastic, black Mio soul 125 na may MV File No. 0401-00000234458 at cellphone.

Nakapiit ang suspek sa SDMU Custodial Facility habang inihahanda ang kasong paglabag sa RA 9165 laban dito. (Bhelle Gamboa)