Asik-Asik Falls sa Baguio District, Davao City isinara sa publiko dahil sa pangamba ng landslide

Isinara muna sa publiko ang Asik-Asik Falls na matatagpuan sa Purok 9, Barangay Carmen, Baguio District, Davao City.

Ayon sa abiso ng Davao City Disaster Risk Reduction and Management Office (DRRMO), bawal muna ang lahat ng uri ng recreational activities sa naturang lugar.

Base kasi sa Flood and Landslide Susceptibility Map ng DENR-Mines Geosciences Bureau XI, ang lugar ay tinukoy bilang “highly susceptible to landslides”.

Dahil dito, hindi ligtas ang mga turista bunsod ng banta ng natural hazards gaya ng rock falls, landslides, at pagbaha.

Inatasan ng CDRRMO ang Barangay Councils ng Carmen at Tamayong, Bantay Bukid, at ang security cluster na mahigpit na ipatupad ang pagbabawal sa leisure activities sa Asik-Asik Falls.

Inatasan din ang Sirib Emergency and Mountain Search and Rescue Auxiliary (SEMSRA) na tumulong sa pagbabantay sa lugar. (DDC)