2 ‘kasapi’ ng criminal group syndicate arestado sa dragnet ops sa Makati City

Napasakamay ng otoridad ang ang dalawang umano’y kasapi ng Rowel Turtosa Robbery Hold-up Group at positibong itinuro ng kanilang huling naging biktima sa Makati City nitong Enero 4.

Kinilala ni Southern Police District (SPD) Director, Brig. General Kirby John Kraft ang mga naarestong suspek na sina Michael Lutas, 25, at Willy Olivarez, 24.

Sa pamamagitan ng video footage, walang dudang itinuro ng biktimang si Lesley Ann ang naturang dalawang suspek na humoldap umano sa kanya sa Chino Roces Avenue at Yulo St., Barangay Bangkal sa lungsod alas-11:00 ng gabi nitong Miyerkules.

Natukoy ng otoridad ang dalawang suspek na miyembro umano ng nasabing criminal group nang beripikahin sa Makati City Police Intelligence Section.

Ayon sa report,tinutukan ng hindi batid na kalibre ng baril ang biktima ng dalawang lalaki na sakay ng isang itim na Yamaha Mio at mabilis na tumakas.

Sa isinagawang dragnet operation ng mga pulis,batay sa ibinigay ng biktima na deskripsiyon ng mga holdaper ay namataan ang mga ito na walang suot na helmet at tuluyang nasakote sa panulukan ng Capinpin at La Guardia Sts. Brgy. Bangkal.

Narekober sa mga suspek ang 9mm Armscor pistol na may pitong bala, at Yamaha Mio 125 motorcycle (MV-File No. 1380-09756102), isang Oppo A37M at isang Techno Spark android phone. (Bhelle Gamboa)