5-taong gulang bata na kabilang sa lulan ng tumaob na bangka sa Cebu, pinaghahanap pa

Pinaghahanap pa ang isang 5 taong gulang na batang lalaki na kabilang sa sakay ng pump boat na tumaob sa San Fernando, Cebu.

Lulan ng pump boat ang 24 na katao at patungo sana ng Calape, Bohol nang lumubog ito Linggo (Jan. 1, 2023) ng gabi.

Pawang residente ng Talisay City ang 24 na lulan ng bangka at bibiyahe sana ng Bohol para dumalo sa birthday celebration ng kaanak.

Ayon sa San Fernando Municipal Disaster Risk Reduction and Management Office (MDRRMO) pagsapit sa karagatang sakop ng Barangay Sangat, lumipat ang mga pasahero ng bangka sa isa pang pump boat na sumundo sa kanila galing Calape.

Habang lumilipat sa bangka ay biglang tumaas ang alon dahilan para tumaob ang isang bangka.

Nailigtas ng mga tauhan ng Philippine Coast Guard at ng MDRRMO ang 23 sakay ng bangka, subalit nawawala ang 5 taong gulang na bata. (DDC)