Pamaskong Handog ng Las Piñas LGU naipamahagi na sa mga barangay

Namahagi na ng Pamaskong Handog ang Las Piñas City Government para sa mga residente mula sa 20 na barangay sa lungsod.

Sinimulan ng lokal na pamahalaan ang pamamahagi ng Christmas food packages nitong Disyembre 16 sa mga barangay.

Pinamunuan ni Mayor Imelda Aguilar ang pagsasaayos ng Pamaskong Handog 2022 at personal na ipinaabot ni Vice Mayor April Aguilar kasama ang mga konsehal ng Las Piñas ang mga Christmas packages sa mga residente.

Masayang-masaya na tinanggap ng mga taga-Las Piñas ang pamaskong handog at nagpasalamat ang mga ito sa kanilang natanggap na maagang regalo mula sa lokal na pamahalaan.

Nais masiguro ni Mayor Mel Aguilar na madama ng kanyang nasasakupan ang pagmamahal at pagbibigayan ngayong panahon ng Kapaskuhan.

“Salubungin po natin ang Pasko at ang pagbubukas ng Bagong Taon nang masaya at ligtas mga Las Piñero,” ayon sa alkalde. (Bhelle Gamboa)