SMC magpapatupad ng toll holiday sa Pasko at Bagong Taon
Magpapatupad ng toll holiday ang San Miguel Corporation (SMC) sa mga pinatatakbo nitong expressways sa Pasko at Bagong Taon.
Bilang bahagi ng holiday tradition ng kumpanya, ilang oras na ililibre ang toll sa STAR, SLEX, Skyway system, NAIAX, at TPLEX.
Ayon kay SMC President Ramon S. Ang, ang toll holiday ay ipatutupad sa sumusunod na mga petsa at oras:
-December 24 (10:00 p.m.) hanggang December 25 (6:00 a.m.)
– December 31 (10:00 p.m.) hanggang January 1 (6:00 a.m.)
Nagpaalala din si Ang sa mga motorista hinggil sa nararanasang traffic buildup at congestion sa mga expressways.
Ito ay dahil sa dagsa ng mga bumibiyaheng motorista.
Payo ni Ang sa mga bibiyahe, planuhin ng maaga ang kanilang pag-alis lalo na kung may naka-schedule na flight. (DDC)
