Simbang Gabi sa Bamboo Organ Church sa Las Piñas, dinarayo

Patuloy ang pagdagsa ng tao sa Saint Joseph Parish o mas kilala sa tawag na Bamboo Organ Church sa Barangay Daniel Fajardo, Las Piñas City simula nang mag-umpisa ang pinakahihintay na Simbang Gabi nitong Disyembre 16.

Buhay na buhay ang kultura at tradisyon ng mga Pilipino ngayong Kapaskuhan dahil pagpapamalas ito ng kanilang matatag na pananampalataya sa Diyos lalo na ng mga Las Piñeros.

Bukod sa mga residente dinarayo rin ng mga taga-karatig lungsod at probinsiya ang naturang sikat na simbahan na ipinagmamalaki ng Las Piñas bilang malaking bentaha sa turismo.

Patok din sa panlasa ng mga deboto at residente ang masasarap at espesyal na panindang puto bumbong, bibingka at iba pang produkto na inilalako sa labas ng simbahan.

Samantala,nagpapatupad din ng tuluy-tuloy na seguridad ang mga tauhan ng Las Piñas City Police sa lugar upang siguruhin ang kaligtasan ng mga dumadalo ng Simbang Gabi at mapanatili maging ang kaayusan sa buong lungsod. (Bhelle Gamboa)