Kabaong grand prize sa Christmas Party ng Philippine Mortuary Association

Madalas na TV, Ref, gadgets at iba pa ang inaabangang mapanalunan sa raffle kapag mayroong Christmas Party. Pero sa Christmas Party na idinaos ng isang grupo, “kabaong” ang kanilang grand prize!

Kamakailan ay nagdaos ng Annual Convention ang Philippine Mortuary Association (PMA) na sinabayan na din ng kanilang Christmas Party.

Ang Philippine Mortuary Association ay grupo ng mga owner ng iba’t ibang funeral services sa bansa.

Sa video na ibinahagi sa Facebook page ng Pador Funeral Homes, makikita ang isang kabaong na mayroon pang ribbon na grand prize para sa raffle.

Maliban kabaong, kabilang din sa mga ipina-raffle ay formaldehyde na ginagamit sa pang-embalsamo at mga marble urn.

Ayon sa event host na si Tita Kei na nagsilbing host sa naturang event sa 11 taon niyang karanasan sa hosting ay ito ang unang pagkakataon na may dinaluhan siyang party na kabaong ang raffle prize.

Sa kabuuan, siyam na kabaong at 20 marble urns ang ipina-raffle para sa mga guests na pawang mula sa funeral industry.

Masaya naman ang mga nanalo dahil hindi ordinaryo o hindi mumurahing ataul ang ipina-raffle.

Ang mga kabaong ay mula sa Batesville na umaabot umano sa halagang P44,000 hanggang P2 million. (DDC)