78 truck ng basura nahakot sa Manila North at Manila South Cemetery

Umabot sa halos 200 metriko toneladang basura ang nakulekta sa Manila North at Manila South Cemeteries nitong nagdaang paggunita ng Undas.

Sa datos mula sa Manila Public Information Office, kabuuang 78 truck ng basura ang nahakot sa dalawang sementeryo.

Higit na mataas ito kumpara noong Undas 2019 o bago magkaroon ng pandemya ng COVID-19 kung saan umabot lang sa 18 truck ng basura ang nakulekta.

Ayon sa Manila PIO, mas dumami ang mga basurang nahakot ngayong taon dulot na din ng nagdaang bagyong Paeng.

Nadagdag sa mga basura ang mga nagtumbahang puno at naglalagang dahon dahil sa pananalasa ng bagyo. (DDC)