Pagdiriwang ng anibersaryo ng Coast Guard pinangunahan ni Pangulong Marcos

Pinangunahan ni Pangulong Ferdinand R. Marcos Jr., ang pagdiriwang ng ika-121 anibersaryo ng pagkakatatag ng Philippine Coast Guard (PCG).

Idinaos ang aktibidad sa Coast Guard headquarters sa Port Area, Maynila araw ng Martes, ika-19 ng Oktubre 2022.

Kinilala ng pangulo ang mga natatanging miyembro ng Coast Guard, gayundin ang mga maritime stakeholders na tumutulong sa pagsasakatuparan ng mga mandato ng PCG.

Sa kanyang mensahe, ibinahagi ni Pangulong Marcos ang mahalagang gampanin ng PCG sa pagpapanatili ng seguridad at kaligtasan sa malawak na katubigan ng Pilipinas.

Kasunod nito, binigyang-diin ng Presidente na patuloy na susuportahan ng kasalukuyang administrasyon ang modernization program ng PCG tungo sa pagbibigay ng mas kapakipakinabang na serbisyo sa sambayanang Pilipino. (DDC)