Anak ni Justice Sec. Boying Remulla naaresto sa drug operation sa Las Piñas City
Kinumpirma ni Cavite Governor Jonvic Remulla na anak ni Justice Secretary Boying Remulla ang lalaking naaresto sa drug operation sa Las Piñas City.
Sa kaniyang post sa Facebook, sinabi ni Gov. Jonvic na si Juanito Jose Diaz Remulla III ay kaniyang pamangking buo at anak ng justice secretary.
Nasa Geneva aniya ngayon si Sec. Boying at pauwi pa lamang bukas.
Ani Gov. Jonvic, sa pakikipag-usap niya kay Sec. Boying, sinabi nitong hindi siya makikialam at hindi gagamitin ang kaniyang impluwensiya sa kasong kakaharapin ng kaniyang anak.
Nagpasalamat naman ang gobernador sa Philippine Drug Enforcement Agency sa pagganap nito sa tungkulin.
Sa ulat ng PDEA, aabot sa P1.3 million na halaga ng marijuana ang nakumpiska sa 38 anyos na suspek sa BF Resort Village, Talon Dos sa Las Piñas City. (DDC)
