DA nagpataw ng SRP sa medium sized na pulang sibuyas

Nagpataw ng Suggested Retail Prices (SRP) ang Department of Agriculture (DA) para sa local onion na ibinebenta sa mga pamilihan sa bansa.

Sa inilabas na administrative order na nilagdaan ni DA Senior Undersecretary Domingo Panganiban, ang SRP para sa medium sized na pulang sibuyas ay P170 kada kilo.

Sa isinagawa kasing price monitoring ng DA, ang sibuyas ay ibinebenta sa mga pangunahing palengke sa Metro Manila ng P190 hanggang P250 kada kilo.

Nakasaad sa circular na dahil sa tumataas na presyo ng produktong petrolyo ay apektado din ang presyo ng mga pangunahing bilihin kabilang na ang agricultural commodities.

Ang pagtatakda ng SRP ayon sa DA ay para makatulong sa mga mamamayan na apektado ng pagtaas ng presyo ng produktong petrolyo at iba pang bilihin. (DDC)