Abalos nag-alok ng P500K rewards para mahanap ang mga suspek sa Percy Lapid slay

Nag-alok si Department of the Interior and Local Government Secretary Benhur Abalos ng isang kalahating milyong piso na pabuya para sa makapapagsabi sa kinaroroonan ng mga sspek na pumaslang sa broadcaster na si Percy Lapid, nang bumisita ang kalihim sa burol ng biktima sa Manila Memorial Park sa Parañaque City nitong Miyerkules ng gabi.

Ayon kay Abalos ang inialok na pabuya ay magmumula sa kanyang personal funds bilang bahagi ng tulong nito sa pamilya na malapit sa kanya.

“I am offering P500,000 from my own money, for any information na makakatulong pa sa imbestigasyon,”sabi nito.

Ginarantiya rin ni Abalos sa naulilang pamilya na gagamitin ng gobyerno ang lahat ng resources nito para matukoy ang pagkakakilanlan ng mga suspek na nasa likod ng krimen.

Aniya tinitignan na rin ng Philippine National Police ang lahat ng posibleng anggulo at magbibigay linaw.

Unang nangako ang opisyal na reresolbahin ang kaso at ipapakulong at papanagutin ang mga suspek.

Si Lapid, na may tunay na pangalang Percival Mabasa ay binaril ng motorcycle-riding tandem malapit sa bahay nito sa Talon Dos, Las Piñas noong Lunes ng gabi. (Bhelle Gamboa)