Guro patay sa pananaksak ng estudyante sa Basey, Samar

Nasawi ang isang high school Science Teacher mula sa Basey National High School matapos saksakin ng kaniyang estudyante.

Sa police report ng Basey Municipal Police Station, ang biktima ay nakilalang si George Lauron, 32 anyos at nagtuturo sa BNHS.

Nagtamo si Lauron ng tama ng saksak sa kaniyang dibdib.

Ayon sa pulisya, ang suspek ay isang senior high student mula sa nasabi ring paaralan at residente ng Brgy. Lawaan, Basey, Samar.

Nangyari ang insidente umaga ng Lunes (Oct. 3) at ang estudyante suspek ay agad ding sumuko sa pulisya.

Sa inisyal na imbestigasyon, magkakasama ang biktima, suspek at isa pang lalaki at nag-iinuman sa inupahang kwarto ng guro.

Sa hindi pa matukoy na dahilan ay nagkaroon ng pagtatalo sa pagitan ng guro at estudyante na nagresulta na sa pananaksak ng suspek.

Dinala pa sa Basey District Hospital ang guro pero idineklarang dead-on-arrival. (DDC)