Batikang komentarista na si Percy Lapid patay sa pananambang

Dead on the spot ang hard-hitting broadcaster at columnist na si Percival Mabasa o mas kilala sa tawag na Percy Lapid, matapos tambangan ng hindi pa nakikilalang mga salarin na magkaangkas sa motorsiklo sa Las Piñas City.

Sa inisyal na imbestigasyon, nabatid na nangyari ang pamamaril pasado alas-8:00 gabi ng Lunes, October 3, 2022 habang lulan si Lapid ng itim na Toyota Innova at papasok sa Sta. Cecilia gate, BF Resort Village, Brgy. Talon 2.

Nasa bungad pa lamang siya ng gate ng village nang bakbakan ng riding-in-tandem at mabilis na tumakas patungo sa hindi matukoy na direksiyon.

Si Lapid ay komentarista ng DWBL at may libu-libong followers sa Youtube at Facebook.

Dati rin siyang brodkaster ng programang “Lapid Fire” sa DZRJ at DWIZ, maliban sa pagiging kolumnista ng ilang pahayagan na may kaparehong titulo ng kanyang programa sa radyo.

Siya ay kapatid ni dating National Press Club (NPC) Pres. Roy Mabasa ng Manila Bulletin.

Patuloy ang imbestigasyon ng mga otoridad sa naturang krimen. (Ricky A. Brozas)