Bangka nasunog sa karagatan ng Isabela City, 1 ang sugatan

Nailigtas ng mga tauhan ng Philippine Coast Guard ang isang lalaki makaraang masunog ang sinasakyan nitong bangka sa karagat ang sakop ng Malamawi Island, Isabela City, Basilan.

Ayon sa ulat ng Coast Guard Sub-Station Malamawi, lulan ng “Motorbanca Prince 1” si Macdal Mahalail, 60 anyos nang mangyari ang insidente.

Ayon kay Mahalail, isinasailalim niya sa sea trial ang bangka na bagong gawa lamang nang biglang mahulog sa makina ang galon na naglalaman ng reserbang gasolina.

Lumiyab ang nasabing galon, na agad dinampot ni Mahalail at inihagis sa tubig.

Nagtamo si Mahalail ng first degree burn sa kanang tuhod at balikat.

Agad itong binigyan ng first aid ng mga tauhan ng Coast Guard.

Pinayuhan din ang kaniyang pamilya na agad itong dalhin sa pinakamalapit na ospital. (DDC)