Pasahero mula Maynila nagpositibo sa monkeypox pagdating ng Hong Kong

Kinumpirma ng Philippine Airlines na isang pasahero ng kanilang flight mula Maynila ang nagpositibo sa monkeypox pagdating sa Hong Kong.

Ayon sa PAL, ang pasahero ay lulan ng PAL flight PR300 flight noong Sept 5, 2022.

Sinabi ni PAL Spokesperson Cielo Villaluna na nakikipag-uugnayan na sila sa health authorities ng Hong Kong para sa pagpapalitan ng karampatang mga impormasyon.

Nakipag-ugnayan na rin ang PAL sa Department of Health (DOH).

Ayon kay Villaluna, patuloy ang pagbibigay ng notification ng PAL sa mga pasahero mula sa nasabing flight lalo na ang mga nakaupo malapit sa nagpositibong pasahero.

Pinapayuhan naman ang mga pasahero mula sa flight na bantayan ang kanilang health condition at agad magpatingin sa doktor kung may mararanasang sintomas. (DDC)