128 katao arestado sa One-Time Big-Time ops ng SPD
Bilang bahagi ng Southern Police District (SPD) sa ipinapatupad na SAFE NCRPO Program kasama rito ang pambansang One-Time Big-Time (OTBT) Operation na nakatuon sa wanted persons,aabot sa 128 na indibiduwal ang naaresto sa isinagawang pagsisilbi ng warrant of arrest nitong Agosto 30.
Sa ulat ng SPD ngayong araw, kabilang sa nahuling wanted persons ay ang Rank No. 2 sa Police Provincial Office Level na Sibat Target List Phase 3 na kinilalang si George Yamit y Marceliana, 44, driver, para sa paglabag sa COMELEC Resolution No.10015 at R.A 10591 at ng Top 4 Most Wanted Person ng Laguna PPO na si Lerna Paloma y Carnasa, para sa 38 bilang ng Qualified Theft, sa ikinasang manhunt operation ng mga operatiba ng San Pedro City Police Station at Las Piñas City Police Warrant and Subpoena Section.
Pinuri naman ni SPD Acting District Director, Col. Kirby John Brion Kraft ang operating units sa kanilang mga naging hakbang na nagresulta ng pagkadakip ng 128 katao.
“Magtutuloy-tuloy po ang aming operasyon at hindi po dito natatapos ang aming focused police operation in targeting wanted persons bilang parte po iyan ng aming anti-criminality campaign upang ating matukoy at maaresto ang mga may pananagutan sa batas,” ani Col. Kraft.
Ang mga naaarestong akusado ay itinurn-over sa Custodial Facility habang naghihintay ng commitment order mula sa korte. (Bhelle Gamboa)
