CSC tatanggap na ng aplikasyon sa mga nais kumuha ng Fire Officer Examination

Sinimulan na ng Civil Service Commission (CSC) ang pagtanggap ng aplikasyon para sa mga nais kumuha ng Fire Officer Examination (FOE).

Ang pagsusulit para sa mga fire officer ay idaraos sa October 23, 2022.

Ayon sa CSC, first-come, first-served basis ang pagtanggap ng aplikasyon at maaring magtapos sa sandaling makamit na ang target number ng mga aplikante sa CSC Regional/Field Offices.

Ang mga interesadong mag-apply ay maaring magsumite ng aplikasyon sa CSC Regional Office (CSCRO), o sa anumang Field Offices ng CSCRO kung saan nila nais kumuha ng pagsusulit.

Sakop ng eksaminasyon para sa FOE ang general ability (verbal, analytical and numerical) at specialized area (fire suppression, fire safety and prevention, fire investigation, and administrative matters). (DDC)