Kai Sotto kasama sa Gilas para sa FIBA Basketball World Cup Window 4 Qualifiers
Kinumpirma ng Samahang Basketbol ng Pilipinas (SBP) na kabilang si Kai Sotto sa Gilas Pilipinas Men’s National Team para sa pagsabak sa FIBA Basketball World Cup Window 4 Qualifiers.
Gaganapin ito sa August 25, 2022 sa Beirut kung saan makakalaban ng Gilas ang Lebanon.
Habang sa August 29, ang Saudi Arabia naman ang makakalaban ng Gilas na gaganapin sa SM Mall of Asia Arena.
Ayon sa SBP, darating si Sotto sa Pilipinas sa August 18.
Nagpasalamat naman si SBP Executive Director at Spokesperson Sonny Barrios kay Sotto sa pagtugon nito para maglaro para sa Philippine team.
Una nang inanunsyo ng SBP na si NBA Utah Jazz Jordan Clarkson ay maglalaro din para sa Gilas sa FIBA Basketball World Cup 2023 Asian Qualifiers – Window 4. (DDC)
