Lalaking nagnakaw ng aso ni Lady Gaga pinatawan ng 4 na taong pagkakakulong

Pinatawan ng apat na taong pagkakabilanggo ang isa sa tatlong lalaking nagnakaw sa aso ng singer na si Lady Gaga.

Naghain ng guilty plea sa California court ang 20-anyos na si Jaylin Keyshawn White para sa kasong second-degree robbery.

Si White ay kasama ng dalawa pang suspek nang kuhanin nila ang French bulldogs na pag-aari ni Gaga habang ipinapasyal ito ni Ryan Fischer na noon ay nasugatan sa pamamaril ng mga suspek.

Kinuha ng tatlong suspek ang mga asong sina Koji at Gustav habang naiwan naman ang isa pa na si Miss Asia.

Nag-alok pa noon si Lady Gaga ng $500,000 na reward para maibalik sa kaniya ang mga alagang aso.

Ang isa pang suspek sa insidente ay pinaghahanap pa.

Habang ang babae na nagbalik sa pulisya ng dalawang aso ay kinasuhan dahil sa pagiging accessory sa krimen. (DDC)