Tweet ng desk editor ng PTV matapos ang insidente ng pamamaril sa Ateneo, pinaiimbestigahan ng Malakanyang

Inatasan ng Malakanyang ang pamunuan ng PTV na imbestigahan ang tweet ng isa nitong empleyado matapos ang naganap na pamamaril sa Ateneo de Manila University sa Quezon City.

Sa tweet ng desk editor ng PTV na si Den Macaranas, sinabi nitong “Nagbarilan na yata ang mga Pinklawan at Dilawan” at naka-mention ang “Ateneo”.

Inulan ng batikos ang nasabing tweet ni Macaranas at maraming netizens ang pumuna sa pagiging insensitive nito.

Ayon kay Press Secretary Trixie Cruz-Angeles, iniutos na ng palasyo ang imbestigasyon sa usapin.

Tiniyak din ni Angeles na gagawa ng karampatang aksyon sa nangyari.

Samantala, sa hiwalay na pahayag, sinabi ng pamunuan ng Radyo Inquirer na hindi na nila empleyado si Macaranas.

Ilan kasi sa mga netizen na nag-reply sa tweet nito ang nag-mention din sa Inquirer.

Ayon sa Radyo Inquirer, simula taong 2019 ay wala na sa network si Macaranas.