Pangulong Marcos dumalo sa cabinet meeting ngayong araw sa pamamagitan ng teleconference
Idinaos ngayong Martes (July 12) ang ikalawang Cabinet Meeting ng Administrasyong Marcos.
Kahit naka-isolate matapos magpositibo sa COVID-19, sinabi ng Office of the Press Secretary na pinangunahan pa rin ni Pangulong Ferdinand Marcos Jr. ang cabinet meeting.
Dumalo si Marcos sa pulong sa pamamagitan ng teleconferencing.
Sa kaniyang Facebook page, ibinahagi ng pangulo ang mga larawan sa idinaos na cabinet meeting.
Sinabi ni Marcos na patuloy ang pagganap niya sa iba pang tungkulin sa pamamagitan ng internet.
“Kahit pangkasalukuyan tayong naka-isolate, patuloy ang ating mga pagpupulong at iba pang tungkulin sa pamamagitan ng internet. Marami ang maitatawid na komunikasyon sa matibay at mabisang digital infrastructure na siya ring sinisikap nating pagandahin pa,” ayon kay Marcos. (DDC)
