Malakanyang “no comment” sa panukalang ipangalan kay Marcos Sr. ang NAIA
Tumanggi ang Malakanyang na magkomento sa panukalang ipangalan ang NAIA kay dating Pangulong Ferdinand E. Marcos Sr.
Ayon kay Press Secretary Trixie Cruz-Angeles, kakahain pa lamang ng panukalang batas at premature pang mag-komento hinggil dito.
Wala din aniya sa posisyon ang palasyo para magkomento kung napapanahon ba o hindi ang panukalang palitan ang pangalan ng Ninoy Aquino International Airport (NAIA).
Magugunitang inihain ni Negros Oriental Rep. Arnolfo Teves Jr. ang House Bill No. 610 para palitan ang pangalan ng NAIA at gawing Ferdinand E. Marcos International Airport.
Sinabi ni Teves na ang NAIA ay naisakatuparan sa ilalim ng panahon ni dating Pangulong Marcos Sr. (DDC)
