PNPA sinabing cardiac arrest ang dahilan ng pagkasawi ng isang kadete
Nasawi dahil sa cardiac arrest ang kadete ng Philippine National Police Academy (PNPA) na si New Cadet Rafael Sakkam.
Pahayag ito ni PNPA Director Police Maj. Gen. Alexander Sampaga makaraang lumabas ang report ng Calabarzon Police na pumanaw si Sakkam ilang araw matapos itong mag-collapse habang sumasailalim sa reception rites.
Sinabi ni Sampaga na cardiac arrest ang ikinasawi ni Sakkam habang ito ay naka-confine sa intensive care unit ng Qualimed Hospital sa Sta Rosa City, Laguna.
Paliwanag pa ng pamunuan ng PNPA, agad dinala sa ospital si Sakkam noong June 7, 2022 matapos mawalan ng malay habang nagsasagawa ng afternoon road run dahil sa heat stroke.
Dahil sa insidente, sinabi ng PNPA na magpapatupad ng mga intervention para masigurong hydrated lagi ang mga kadete sa kasagsagan ng kanilang summer training.
Tiniyak din ni Sampaga na ipinagkaloob ng PNPA ang lahat ng pangangailangan ni Cadet Sakkam habang siya ay nasa ospital at patuloy silang tutulong hanggang sa siya ay maihatid sa huling hantungan. (DDC)
