2 Filipino-Chinese nailigtas mula sa kanilang kidnaper, 2 suspek nasawi sa engkwentro

Patay ang dalawang suspek habang sugatan ang isang pulis sa ikinasang anti-kidnapping operation sa Rizal, Martes (June 14) ng umaga.

Nailigtas sa nasabing operasyon ang dalawang biktima na kinabibilangan ng 21-anyos na estudyante at kaniyang pinsang negosyante na 34-anyos.

Ayon kay PNP Officer-in-Charge, Police Lieutenant General Vicente D Danao Jr., sampung araw na hawak ng mga suspek ang dalawang biktima bago sila nailigtas.

Dinukot sila ng mga suspek sa Tondo, Manila noong June 4, 2022 at humingi ng P100,000,000 na ransom ang mga suspek sa kanilang mga kaanak.

Pero humingi ng tulong sa pulisya ang pamilya ng mga biktima dahilan para makapagkasa ng rescue operations.

Itinakda ang ransom pay-off sa Calamba City, Laguna subalit kalaunan ay inilipat ng mga suspek sa Pakil, Laguna at pagkatapos ay pinalaya ang mga biktima sa Famy, Laguna.

Ayon kay Danao nakawa ng mga tauhan ng PNP-AKG na ma-track ang ginamit na getaway vehicle ng mga suspek sa bahagi ng Pililia, Rizal kung saan nagkaroon ng engkwentro na nagresulta sa pagkasawi ng dalawang suspek at pagkasugat ng isang pulis.

Nakilala ang mga suspek sa pamamagitan ng kanilang ID cards na sina Rolly Castillo at Jerameel Ventura. (DDC)