Defense Sec. Lorenzana nasa maayos nang kalagayan matapos mag-collapse sa Rizal Park

Nag-collapse si Defense Secretary Delfin Lorenzana habang dumadalo sa Independence Day rites sa Rizal Park sa Maynila.

Habang nakatayo para sa Flag Raising Ceremony ay bigla na lamang bumagsak si Lorenzana.

Agad naman itong naisakay sa ambulansya at nadala sa ospital.

Ayon kay DND spokesperson Arsenio Andolong, stable na ang kondisyon ng kalihim at pinayuhan itong magpahinga.

Maari aniyang pagod ang kalihim dahil kadarating lamang nito galing Singapore Lilngg (June 12) ng umaga matapos dumalo sa dayalogo at meeting kasama ang mga foreign counterparts.

Pagkatapos ay agad itong dumeretso sa Rizal Park.

Samantala, sa kaniyang post sa Facebook, sinabi ni Lorenzana na malilban sa pagod ay matindi rin ang init sa Luneta.

“The fatigue from my recent successive international security engagements may have taken its toll on me. Tapos napakainit pa sa Luneta kanina. But as the saying goes, a true soldier always gets up quickly after a fall,” ayon kay Lorenzana.

Ayon sa kalihim, maayos na ang kondisyon niya at maayos ang resulta ng lahat ng tests na isinagawa sa kaniya. (DDC)