Lalaki nakipag-divorce sa misis dahil sa paulit-ulit na paghahain ng instant noodles

Naghain ng divorce ang isang lalaki sa India laban sa kanyang misis matapos itong maumay sa paulit-ulit na pagsisilbi sa kanya ng instant noodles tuwing almusal, tanghalian at hapunan.

Ayon kay Presiding Judge ML Raghunath, nagreklamo ang lalaki dahil wala umanong alam sa pagluluto ang kanyang asawa at laging instant noodles ang ipinapakain sa kanya araw-araw.

Ayon pa sa mister, kapag nagtutungo ang kanyang misis sa grocery shopping ay pawang instant noodles lamang ang binibili nito.

Ang naturang insidente na tinawag na “Maggi case,” ay naging rason para maghiwalay ang mag-asawa.

Sinabi pa ni Raghunath sa New Indian Express, tumataas ang bilang ng kaso ng diborsiyo sa India.

Meron din aniyang pagkakataon na ang diborsiyo ay inihahain agad kinabukasan pagkatapos ng kasal dahil sa iba’t ibang dahilan katulad ng hindi pakikipag-usap sa kanilang kapareha, paglalagay ng asin sa maling parte ng plato, hindi tamang kombinasyon ng kulay na isinusuot ng kanilang asawa at kung anu-ano pa.

Noon lamang Marso, isang lasing na lalaki ang tumawag sa pulis para isumbong ang kanyang misis dahil hindi umano siya ipinagluto ng pulutan. (DJ Ricksmile/Infinite Radio Calbayog)