Matandang lalaki sa China dinala sa morge ng naka-body bag kahit buhay pa
Isang matandang lalaki ang nailagay sa body bag at nadala sa morge kahit ito ay buhay pa sa Shanghai, China.
Viral ngayon sa mga social media platforms sa China ang video footage na nakuhanan ng isang netizen sa isang morge sa Shanghai.
Makikita sa video ang mga staff ng morge na nakasuot ng protective gear mula ulo hanggang paa, habang binubuksan ang body bag.
Pero nagulat sila nang makitang buhay na matandang lalaki ang nasa loob nito.
Sa video na ibinahagi sa Weibo platform sa China, nakasaad ang caption na “The nursing home is such a mess. They sent a living person on a hearse and said they were dead. The undertaker staff said they were still moving … It is irresponsible, really irresponsible.”
Sa inilabas na pahayag ng district government ng Shanghai, sinabing nasa stable na kondisyon na ang matandang lalaki.
Tatlong opisyal din ang sinibak sa serbisyo na pawang mula sa civil affairs bureau, social development office, at mula sa nursing home dahil sa insidente.
Tinanggalan na rin ng certification ang isang doktor na sangkot sa insidente at sumasailalim ngayon sa imbestigasyon ayon sa ulat ng state-run na Global Times. (DDC)
